„სასოფლო-სამეურნეო დანიშნულების მიწის რესურსზე ხელმისაწვდომობის“ სახელმწიფო პროგრამის დამტკიცების შესახებ“ საქართველოს მთავრობის 2020 წლის 23 ივლისის №464 დადგენილებაში ცვლილების შეტანის თაობაზე

1. დადგენილების მე-3 მუხლი ჩამოყალიბდეს შემდეგი რედაქციით:

„მუხლი 3. საქართველოს ეკონომიკისა და მდგრადი განვითარების სამინისტროს დაევალოს საქართველოს ორგანულ კანონში „ადგილობრივი თვითმმართველობის კოდექსში“ შესაბამისი ცვლილებების ინიციირება, ამ დადგენილებით დამტკიცებული პროგრამის ანალოგიური პროგრამის მუნიციპალიტეტის საკუთრებაში არსებული იჯარით გაცემული სასოფლო-სამეურნეო დანიშნულების სახნავი და სათიბი კატეგორიის მიწის ნაკვეთებთან მიმართებით განხორციელების შესაძლებლობის უზრუნველსაყოფად.“.

2.  დადგენილებით დამტკიცებული „სასოფლო-სამეურნეო დანიშნულების მიწის რესურსზე ხელმისაწვდომობის“ სახელმწიფო პროგრამის:

ა) მე-2 მუხლის:

ა.ა)  „ბ“ ქვეპუნქტი ჩამოყალიბდეს შემდეგი რედაქციით:

„ბ) უძრავი ნივთი − სახელმწიფო საკუთრებაში არსებული სასოფლო-სამეურნეო დანიშნულების სახნავი ან/და სათიბი კატეგორიის მიწის ნაკვეთ(ებ)ი, რომელიც/რომლებიც მოიჯარეს იჯარის უფლებით აქვს გადაცემული;“;

ა.ბ) „დ“ ქვეპუნქტი ჩამოყალიბდეს შემდეგი რედაქციით:

„დ) იჯარის ხელშეკრულება − 2021 წლის 31 მარტის ჩათვლით დადებული, განცხადების წარდგენის დროისათვის მოქმედი და სსიპ − საჯარო რეესტრის ეროვნულ სააგენტოში  რეგისტრირებული სახელმწიფო საკუთრებაში არსებული უძრავი ნივთის იჯარის უფლებით გადაცემის თაობაზე გაფორმებული იჯარის ხელშეკრულება, რომლის მხარეებსაც წარმოადგენენ მოიჯარე და სააგენტო (მათ შორის, უფლებამონაცვლეობის საფუძველზე);“;

ბ) მე-3 მუხლის პირველი პუნქტის „ბ“ ქვეპუნქტი ამოღებულ იქნეს;

გ) მე-4 მუხლის მე-2 პუნქტის „გ“ ქვეპუნქტი ჩამოყალიბდეს შემდეგი რედაქციით:

„გ) სასოფლო-სამეურნეო დანიშნულების სახნავი კატეგორიის მიწის ნაკვეთ(ებ)ის პრივატიზების თაობაზე განცხადების წარდგენის შემთხვევაში, შესაბამისი მუნიციპალიტეტის ან საქართველოს გარემოს დაცვისა და სოფლის მეურნეობის სამინისტროს მმართველობის სფეროში მოქმედი საჯარო სამართლის იურიდიული პირის – მიწის მდგრადი მართვისა და მიწათსარგებლობის მონიტორინგის ეროვნული სააგენტოს წერილი, ხოლო სასოფლო-სამეურნეო დანიშნულების სათიბი კატეგორიის მიწის ნაკვეთ(ებ)ის პრივატიზების თაობაზე განცხადების წარდგენის შემთხვევაში, შესაბამისი მუნიციპალიტეტის წერილი, რომლ(ებ)ითაც მარწმუნებლად უნდა დასტურდებოდეს იჯარის ხელშეკრულების გაფორმების შემდგომ სასოფლო-სამეურნეო დანიშნულების სახნავი/სათიბი კატეგორიის მიწის ნაკვეთ(ებ)ის სასოფლო-სამეურნეო დანიშნულებით გამოყენების ფაქტი;“;

დ) მე-5 მუხლის მე-8 პუნქტის „გ“ ქვეპუნქტი ამოღებულ იქნეს

ე) მე-6 მუხლის მე-2 პუნქტი ჩამოყალიბდეს შემდეგი რედაქციით:

„2. თუ იჯარის ხელშეკრულებით მოიჯარისათვის სახნავი ან/და სათიბი კატეგორიის მიწის ნაკვეთთან ერთად ასევე გადაცემულია სხვა კატეგორიის სასოფლო-სამურნეო დანიშნულების მიწის ნაკვეთ(ებ)ი, ამ მუხლის პირველი პუნქტით გათვალისწინებულ შემთხვევაში, სხვა კატეგორიის მიწის ნაკვეთებზე ნარჩუნდება მოიჯარის სარგებლობის უფლება.“;

ვ) მე-9 მუხლი ჩამოყალიბდეს შემდეგი რედაქციით

„მუხლი 9. უძრავი ნივთის ნაწილის გასხვისების დაუშვებლობა

დაუშვებელია ერთი და იმავე იჯარის ხელშეკრულებით გათვალისწინებული სახნავი ან/და სათიბი კატეგორიის უძრავი ნივთ(ებ)ის ნაწილის პრივატიზება, გარდა ამ პროგრამის მე-5 მუხლის მე-9 პუნქტით გათვალისწინებული შემთხვევისა.“.