1. ავტოჟირის და შვეულმფრენის შემთხვევაში, რომლებსაც არ გააჩნიათ სტაბილიზატორის მქონე ორნიჩბიანი მზიდი ხრახნი, მხედველობაში უნდა იქნეს მიღებული სახმელეთო რეზონანსის ცდების განხორციელება.
2. მოტოდელტაპლანის, ავტოჟირის და შვეულმფრენის ურიკებზე ცდების განხორციელების შემთხვევაში, ცდები უნდა ჩატარდეს მხოლოდ დადებით დატვირთვაზე, რა დროსაც დატვირთვის მოდება უნდა განხორციელდეს ფრთის ქვემოთ მიმაგრების სტანდარტულ წერტილში.
3. ფრთაზე ცდების განხორციელების შემთხვევაში შესაძლებელია ფრთაზე დატვირთვის მოხსნის გათვალისწინება, ფრთის მასის მნიშვნელობიდან გამომდინარე. დელტაპლანის შემთხვევაში, იმის გათვალისწინებით, რომ ე.წ. „Ca“ არის ფრთის დატვირთვა, მხედველობაში მიიღება ამწევი ძალის მნიშვნელობის წრფივი შემცირება 2Ca მნიშვნელობიდან 0-ის მნიშვნელობამდე, ფრთის სიმეტრიის ღერძიდან ფრთის გაქანისკენ.
4. ფრთის ქორდის გასწვრივ ამწევი ძალის განაწილება ხორციელდება ფრთის წინა კიდიდან: 5Ca მნიშვნელობიდან ქორდის 25%-ზე არსებული Ca-ს მნიშვნელობისკენ, ხოლო ფრთის უკანა კიდეზე: Ca-დან 0-ის მნიშვნელობამდე. თვითმფრინავის შემთხვევაში, ზუსტი მონაცემების არარსებობის შემთხვევაში უნდა ჩაითვალოს, რომ ამწევი ძალის ტოლქმედი მოქმედებს ფრთის წინა კიდიდან ფრთის ქორდის სიგრძის 25%-ზე და რომ ფრთის გაქანის მიმართულებით ამწევი ძალის განაწილება (მართკუთხა ფორმის ფრთისთვის) მუდმივია (სხვა შემთხვევაში იხ. CS-VLA).
5. ფრთის დამჭერი ორი ძელის (ბაგირის) მქონე თვითმფრინავის თითოეულ ფრთაზე გრეხის ძალის გავლენა უნდა იქნეს უგულებელყოფილი, თუმცა ყველა შემთხვევაში მხედველობაში უნდა იქნეს მიღებული დატვირთვა, რომელიც დაკავშირებულია Va სიჩქარეზე ელერონის მყისიერ გადახრასთან.
6. კუდის ფრთასხმულობაზე (თვითმფრინავი და ავტოჟირი) უნდა განხორციელდეს შემდეგი ცდები:
ა) Va სიჩქარეზე სიმაღლის საჭის მყისიერი გადახრა;
ბ) Va სიჩქარეზე მიმართულების საჭის მყისიერი გადახრა;
გ) ჰორიზონტალური სტაბილიზატორის ასიმეტრიული დატვირთვა, რომელიც სტაბილიზატორის ერთ მხარეს შეესაბამება მაქსიმალური დატვირთვის 100%-ს, ხოლო საპირისპირო მხარეს 70%-ს;
დ) კომბინირებული დატვირთვა, რომელიც შედგება ჰორიზონტალური სტაბილიზატორის მაქსიმალური დატვირთვის 75%-ის, ხოლო ვერტიკალური სტაბილიზატორის 100% დატვირთვის მნიშვნელობებისაგან.