წესების მე-4 მუხლით განსაზღვრული ზოგადი პრინციპების გარდა, მემცენარეობის ბიომეურნეობაში დაცული უნდა იქნეს შემდეგი სპეციფიკური წესები:
ა) ნიადაგის დამუშავებისა და კულტივაციისათვის ისეთი მეთოდების გამოყენება, რომლებიც ხელს შეუწყობს ნიადაგში ორგანული ნივთიერებების შენარჩუნებასა და მატებას, დაიცავს მას ეროზიისა და გამკვრივებისაგან;
ბ) ნიადაგის ნაყოფიერების, ბიოლოგიური აქტივობის შენარჩუნებისა და ამაღლებისათვის, მეურნეობაში ბიომრავალფეროვნების შენარჩუნებისათვის მრავალწლოვანი თესლბრუნვის გამოყენება, პარკოსანთა ოჯახის წარმომადგენლების, ან მძლავრი ფესვთა სისტემის მქონე კულტურების ჩართვით, მწვანე სასუქის, ბიომეურნეობიდან მიღებული ცხოველის ნაკელის და ორგანული ნარჩენების გამოყენება (უმჯობესია კომპოსტირებული). დაშვებულია, ასევე სასათბურე წარმოება, მრავალწლიანი მცენარეები, მუდმივი საძოვრები;
გ) ბიოწარმოებაში დამზადებული ნიადაგის გამანოყიერებელი საშუალებების კომპოსტირებული ან არაკომპოსტირებული სახით გამოყენება, ამასთან შეტანილი ნაკელის რაოდენობა არ უნდა აჭარბებდეს 170 კგ აზოტს ჰექტარზე წელიწადში;
დ) სხვა ბიომეურნეობიდან მიღებული სასუქის გამოყენება დასაშვებია თესლბრუნვის პირობებში მცენარის საკვები ნივთიერებებით დაკმაყოფილების უზრუნველსაყოფად, ან იმ შემთხვევაში, თუ ნიადაგის გაუმჯობესება ამ მუხლის „გ“ ქვეპუნქტში მითითებული საშუალებებით შეუძლებელია;
ე) მიკროორგანიზმების შემცველი საშუალებების გამოყენება დაშვებულია ნიადაგის სტრუქტურის გასაუმჯობესებლად, ასევე კომპოსტის აქტივაციისათვის;
ვ) ბიოსასუქის დამზადებამ, შენახვამ და გამოყენებამ არ უნდა დააბინძუროს ზედაპირული და მიწისქვეშა წყლები;
ზ) დაშვებულია ბიოდინამიური პრეპარატებისა და დანართი N1-ით ნებადართული სასუქებისა და ნიადაგის ნაყოფიერების ასამაღლებელი საშუალებების გამოყენება;
თ) დაუშვებელია მინერალური აზოტშემცველი სასუქების და ქიმიური სინთეზით მიღებული სასუქების გამოყენება;
ი) ნიადაგის დამცავი საფარისათვის დაშვებულია სინთეზური მულჩი, სილოსი, პოლიეთილენისა და პოლიპროპილენის ან სხვა პოლიკარბონატების პროდუქტები. გამოყენების შემდეგ ეს მასალები უნდა მოცილდეს ნიადაგს, თუმცა არ უნდა დაიწვას მეურნეობაში;
კ) დაუშვებელია პოლიქლორიდის პროდუქტების გამოყენება;
ლ) სათესლე და ვეგეტატიური გამრავლების მასალის წარმოებისათვის დაშვებულია მხოლოდ ბიომეთოდებით მიღებული სათესლე და ვეგეტაციური გამრავლების მასალის გამოყენება;
მ) ბიომეთოდებით მიღებული სათესლე და ვეგეტატიური გამრავლების მასალის წარმოებისათვის გამოყენებული ერთწლიანი მცენარის მოყვანა უნდა მოხდეს ბიოწარმოების პრინციპების დაცვით სულ მცირე ერთი თაობის, ხოლო მრავალწლოვანი კულტურების შემთხვევაში – ორი სავეგეტაციო პერიოდის განმავლობაში;
ნ) სერტიფიკაციის ორგანოს თანხმობის შემთხვევაში, ინდივიდუალურად, დაშვებულია არაბიომეურნეობიდან მიღებული სათესლე მასალისა და ვეგეტაციური გამრავლების ორგანოების გამოყენება;
ო) მცენარეთა დაცვა დაავადებების, სარეველებისა და მავნებლებისაგან ხორციელდება სახეობებისა და ჯიშების შერჩევით, თესლბრუნვაში ერთწლიანი და მრავალწლიანი კულტურების შერჩევით, კულტივაციისა და თერმული პროცესების გამოყენებით;
პ) მცენარეთა მავნებლების, დაავადებებისა და სარეველებისგან დასაცავად ამ მუხლის „ო“ ქვეპუნქტით განსაზღვრული საშუალებების გარდა, დაშვებულია დანართი N2-ით ნებადართული პესტიციდებისა და მცენარეთა დაცვის საშუალებების გამოყენება. დამჭერებად ან მახეებში გამოყენებული ნივთიერებები (ფერომონების გარდა) უშუალოდ არ უნდა ეხებოდეს კულტივირებულ მცენარეს;
ჟ) მცენარეები და მათი ნაწილები, აგრეთვე მათი პროდუქტები, შეიძლება ჩაითვალოს „ბიოპროდუქტად“ წესების მე-11 მუხლით დადგენილი კონვერსიის პერიოდის გავლის შემდეგ;
რ) ბუნებაში, ტყეებსა და სასოფლო-სამეურნეო ტერიტორიაზე ველურადმზარდი მცენარისა და მათი ნაწილების შეგროვება ჩაითვლება ბიოწარმოებად თუ:
რ.ა) ამ ტერიტორიაზე, შეგროვების დაწყებამდე არა ნაკლებ სამი წლის განმავლობაში არ გამოყენებულა ისეთი ნივთიერებები, რომლებიც არ არის ნებადართული დანართი №1 და დანართი №2-ით;
რ.ბ) შეგროვება არ ახდენს გავლენას ბუნებრივი ჰაბიტატის სტაბილურობაზე და ამ ტერიტორიაზე ველურადმზარდი მცენარეების სახეობის შენარჩუნებაზე;
ს) სოკოს წარმოებაში დაშვებულია სუბსტრატის გამოყენება, თუ იგი, გარდა დანართი №1-ით ნებადართული ნივთიერებებისა, შედგება ქიმიურად დაუმუშავებული ტორფისა და ხის მასალისაგან, თუ ბიომეურნეობაში მიღებული ნაკელი და ცხოველის ექსკრემენტები ხელმისაწვდომი არ არის, დასაშვებია ნაკელისა და ცხოველის ექსკრემენტების 25%-ის შეტანა კონვერსიული მეურნეობიდან;
ტ) მოსავლის აღების, დასაწყობებისა და ტრასპორტირებისას, დაბინძურების თავიდან აცილების მიზნით, აუცილებელია წესების მე-12 მუხლით განსაზღვრული მოთხოვნების დაკმაყოფილებ