მუხლი 2. ტერმინები და განმარტებები

1. ამ წესში მოცემულ ტერმინებს აქვთ შემდეგი მნიშვნელობები:

ა) ზსხ-ის საფრენოსნო ეკიპაჟის შემადგენლობა (შემდგომში – საფრენოსნო ეკიპაჟის შემადგენლობა) – ზსხ-ის საფრენოსნო ექსპლუატაციის განხორციელების უფლებამოსილების მქონე მოწმობის მფლობელი პირები;

ბ) ვადის გაგრძელება – კვალიფიკაციის მოქმედების ვადის განმავლობაში საქართველოს ეკონომიკისა და მდგრადი განვითარების სამინისტროს სისტემაში შემავალი საჯარო სამართლის იურიდიული პირის სამოქალაქო ავიაციის სააგენტოს (შემდგომში – სააგენტო) მიერ გამოცემული ადმინისტრაციული აქტი, რომელიც მოწმობის მფლობელს საშუალებას აძლევს, დადგენილი მოთხოვნების შესრულებით გააგრძელოს კვალიფიკაციით მინიჭებული უფლებების გამოყენება შემდგომი განსაზღვრული პერიოდით;

გ) ვადის განახლება – კვალიფიკაციის მოქმედების ვადის ამოწურვის შემდეგ სააგენტოს მიერ გამოცემული ადმინისტრაციული აქტი, რომელიც დადგენილი მოთხოვნების შესრულების შემდეგ, აახლებს შესაბამისი კვალიფიკაციით მინიჭებულ უფლებებს შემდგომი განსაზღვრული პერიოდით;

დ) ზსხ-ის მეთაური – საჰაერო ხომალდის ფრენისას, მის მართვასა და უსაფრთხოებაზე პასუხისმგებელი პილოტი;

ე) ინსტრუქტორთან ერთად ფრენა – შესაბამისი კვალიფიკაციის მქონე პილოტის (ინსტრუქტორობის კანდიდატი, ზსხ-ის პილოტის ინსტრუქტორი) მიერ პილოტ-კურსანტის ან მოწმობის მფლობელი პირისთვის ჩატარებული საფრენოსნო მომზადება;

ვ) კვალიფიკაცია – სერტიფიკატში აღნიშნული ინფორმაცია, რომელიც ადგენს აღნიშნული სერტიფიკატისთვის სპეციალურ პირობებს, უფლებებს ან შეზღუდვებს;

ზ) მგზავრი – პირი, რომელიც იმყოფება ზსხ-ის ბორტზე ზსხ-ის მეთაურის თანხმობით, გარდა საფრენოსნო ეკიპაჟის შემადგენლობისა;

თ) მოწმობა – საჰაერო ხომალდის ბორტზე განსაზღვრული ფუნქციების განხორციელებისთვის საჭირო უნარ-ჩვევების დამადასტურებელი დოკუმენტი;

ი) საფრენოსნო დრო – საერთო დრო, აფრენის მიზნით ზსხ-ის მიერ მოძრაობის დაწყებიდან (შვეულმფრენისთვის: მზიდი ხრახნის ბრუნვის დაწყებიდან) ფრენის დასრულებისას მის სრულ გაჩერებამდე (შვეულმფრენისთვის: შვეულმფრენის სრულ გაჩერებამდე და მზიდი ხრახნის ბრუნვის შეჩერებამდე);

კ) სერტიფიკატი – დოკუმენტი, რომელიც მოწმობის მფლობელს განსაზღვრული ვადით ანიჭებს უფლებას ზსხ-ის ბორტზე შეასრულოს ამ დოკუმენტით მინიჭებული ფუნქციები;

ლ) შეთანხმებული სწავლება – სააგენტოს მიერ დადგენილი პროგრამის შესაბამისი თეორიული და პრაქტიკული სწავლება, რომელიც ტარდება სააგენტოსთან შეთანხმებული შესაბამისი კვალიფიკაციის მქონე პირების მიერ;

მ) უფლებამოსილი გამომცდელი – სააგენტოს მიერ უფლებამოსილი პირი, რომელიც ახორციელებს ამ წესით გათვალისწინებულ შესაბამის თეორიულ და საფრენოსნო შემოწმებებს;

ნ) უფლებამოსილი ინსტრუქტორი – ზსხ-ის პილოტის ინსტრუქტორი, რომელიც ფლობს ამ წესით განსაზღვრულ შესაბამის კვალიფიკაციას სწავლების ჩატარების ან შემოწმების განხორციელების მიზნით;

ო) პილოტ-კურსანტი – შესაბამისი კვალიფიკაციის მქონე ინსტრუქტორის მიერ საფრენოსნო ეკიპაჟის შემადგენლობაში დაშვებული პირი, რომელიც გადის საფრენოსნო მომზადებას (ინსტრუქტორთან ერთად ან დამოუკიდებლად ფრენის შესრულებისას).

2. ამ წესში მოცემულ განმარტებებს აქვთ შემდეგი მნიშვნელობები:

ა) ზსხ – ზემსუბუქი საჰაერო ხომალდი;

ბ) სთ – საათი;

გ) სდ – სასწავლო დაწესებულება.