1. სამრეწველო დანიშნულების ფეთქებადი მასალების (შემდგომში – ფეთქებადი მასალები) დანაკლისის (დატაცების, დაკარგვის ან გაბნევის) შემთხვევების ტექნიკურ გამოკვლევას ახორციელებს სსიპ – საქართველოს ტექნიკური ზედამხედველობის სახელმწიფო ინსპექცია (შემდგომში – ტექზედამხედველობა).
2. ფეთქებადი მასალების დატაცებად, დაკარგვად და გაბნევად (შემდგომში – დანაკლისად) ითვლება:
ა) ფეთქებადი მასალების დატაცება – საწარმოს კუთვნილი ფეთქებადი მასალების უკანონოდ მისაკუთრება;
ბ) ფეთქებადი მასალების დაკარგვა – ფეთქებადი მასალების ბრუნვის წესების დარღვევის შედეგად გამოწვეული დანაკარგები;
გ) ფეთქებადი მასალების გაბნევა – ფეთქებადი მასალების ისეთ ადგილებში განთავსება, რომლებიც არ შეესაბამება „საამფეთქებლო სამუშაოების უსაფრთხოების წესების“ მოთხოვნებს.
3. ტექნიკურ გამოკვლევასა და აღრიცხვას ექვემდებარება საწარმოში, ორგანიზაციაში (შემდგომში – საწარმო) ფეთქებადი მასალების დანაკლისის ყველა შემთხვევა, რომლებიც განსაზღვრულია ამ მუხლის მე-2 პუნქტში.
4. ტექნიკური გამოკვლევის მიზანია:
ა) დაადგინოს ფეთქებადი მასალების დანაკლისის გარემოება და მიზეზი;
ბ) გამოავლინოს ფეთქებადი მასალების შენახვის, გადაზიდვის, გამოყენებისა და აღრიცხვის დადგენილი წესის დარღვევები;
გ) დასახოს ღონისძიებები ანალოგიური დარღვევების თავიდან ასაცილებლად, რომელთა შესრულება სავალდებულოა იმ საწარმოთათვის, სადაც ეს შემთხვევა მოხდა.
5. საწარმოში ფეთქებადი მასალების დანაკლისის ყველა შემთხვევას საწარმოს ადმინისტრაცია არეგისტრირებს (აღრიცხავს) სპეციალურ ჟურნალში (დანართი 1).
6. ტექნიკური გამოკვლევის მასალების საფუძველზე დგება ტექნიკური გამოკვლევის აქტი 3 ეგზემპლარად, რომელთაგან 1 რჩება საწარმოში, 1 გადაეცემა ტექზედამხედველობას, 1 – შინაგან საქმეთა სამინისტროს