მუხლი 2. დეპარტამენტის ძირითადი ამოცანები და ფუნქციები

1. დეპარტამენტის ძირითადი ამოცანაა „ეროვნული უშიშროების საბჭოს შესახებ“ საქართველოს ორგანული კანონის მოთხოვნათა შესაბამისად ხელი შეუწყოს ქვეყნის თავდაცვისუნარიანობის განვითარებას, განახორციელოს ამ მიმართულებით მიმდინარე მოვლენების შეფასება, ანალიზი და შეიმუშაოს შესაბამისი რეკომენდაციები, რისთვისაც იგი:
ა) ახორციელებს სამხედრო და სამხედრო-პოლიტიკურ სფეროში ქვეყნის უსაფრთხოების არსებული გარემოს შეფასებას, საფრთხეებისა და გამოწვევების ანალიზს და შეიმუშავებს შესაბამის რეკომენდაციებს;
ბ) შეიმუშავებს წინადადებებსა და რეკომენდაციებს ქვეყნის თავდაცვის პოლიტიკისა და სტრატეგიის შესახებ;
გ) საქართველოს პრეზიდენტის თანაშემწის ეროვნული უშიშროების საკითხებში – ახორციელებს ეროვნული უშიშროების საბჭოს მდივნის ინფორმაციულ და ანალიტიკურ უზრუნველყოფას ქვეყნის თავდაცვის, სამხედრო, სამხედრო-პოლიტიკურ და სამხედრო-ტექნიკურ საკითხებთან დაკავშირებით;
დ) ახორციელებს სამხედრო, სამხედრო-პოლიტიკურ და სამხედრო-ტექნიკურ სფეროებში ქვეყნის შესაბამისი სამსახურების საქმიანობისა და ამ სფეროში მიმდინარე ეროვნული და საერთაშორისო პროგრამების კოორდინაციას, მონიტორინგსა და ანალიზს;
ე) ახორციელებს ქვეყნის სამხედრო სამრეწველო-სამეცნიერო და სამხედრო-საინჟინრო უზრუნველყოფის სახელმწიფო კომპლექსების ფუნქციონირების, მატერიალური რეზერვებისა და ეკონომიკის სამობილიზაციო მზადყოფნასთან დაკავშირებული საკითხების, აგრეთვე, ზემოაღნიშნული კომპლექსის განვითარების სახელმწიფო პოლიტიკის შემუშავებისა და მისი რეალიზაციის საკითხების კოორდინაციას;
ვ) ახორციელებს სამხედრო და ორმაგი დანიშნულების პროდუქციის იმპორტის, ექსპორტის, ტრანზიტის, აგრეთვე, ქვეყანაში იარაღის ბრუნვასთან დაკავშირებული საკითხების კოორდინაციას და მონიტორინგს;
ზ) ახორციელებს ეროვნული უშიშროების საბჭოს სამხედრო-ტექნიკურ საკითხთა მუდმივი საუწყებათაშორისო კომისიისა და ამ კომისიასთან არსებული ექსპერტთა თუ მიზნობრივი ჯგუფების საქმიანობის ორგანიზაციულ და ტექნიკურ უზრუნველყოფას;
თ) საქართველოს პრეზიდენტის დავალებით მონაწილეობს ეროვნული უშიშროების საბჭოსთან შექმნილი მუდმივი და დროებითი საუწყებათაშორისო კომისიების საქმიანობის წარმართვასა და ორგანიზაციულ უზრუნველყოფაში;
ი) საქართველოს პრეზიდენტის დავალების შესაბამისად მონაწილეობას იღებს ქვეყანაში საგანგებო და კრიზისული სიტუაციების მართვის პროცესში;
კ) ახორციელებს ქვეყნის სამხედრო ძალების შესახებ საქართველოს პრეზიდენტის შესაბამისი აქტებისა და დავალებების შესრულების საერთო კონტროლს;
ლ) ახორციელებს შესაბამისი სახელმწიფო და არასახელმწიფო დაწესებულებებიდან ინფორმაციისა და დოკუმენტაციის გამოთხოვასა და მიღებას, საჭიროების შემთხევევაში, მათ წარდგენას საქართველოს პრეზიდენტისათვის;
მ) თავისი კომპეტენციის სფეროში საქართველოს პრეზიდენტს წარუდგენს ეროვნული უშიშროების საბჭოს სხდომაზე განსახილველ საკითხთა შესახებ წინადადებებსა და რეკომენდაციებს;
ნ) საქართველოს პრეზიდენტის დავალების, ეროვნული უშიშროების საბჭოს რეკომენდაციის საფუძველზე, კანონმდებლობით დადგენილი წესით დეპარტამენტის კომპეტენციას მიკუთვნებულ საკითხებზე ამზადებს საქართველოს პრეზიდენტის სამართლებრივი აქტების პროექტებს და ახორციელებს საქართველოს პრეზიდენტის გადაწყვეტილებათა აღსრულების კონტროლს;
ო) ამზადებს საქართველოს პრეზიდენტის სამართლებრივი აქტების პროექტებს თავდაცვის სფეროში კანონმდებლობით განსაზღვრულ თანამდებობის პირთა დანიშვნის, გათავისუფლების, სამხედრო და სპეციალური წოდებების მინიჭების შესახებ;
პ) საქართველოს პრეზიდენტისათვის მოსახსენებლად განიხილავს სამხედრო ძალებში შემავალი უწყებების მიმართვებსა და წერილებს და წარადგენს რეკომენდაციებს;
ჟ) თავისი კომპეტენციის ფარგლებში მონაწილეობას იღებს სახელმწიფო სტრუქტურების უწყებათა შორის თანამშრომლობის ორგანიზებაში