1. მწარმოებელი ან საქართველოში მისი უფლებამოსილი წარმომადგენელი, ხოლო მათი საქართველოში არყოფნის შემთხვევაში, იმპორტიორი ან/და დანადგარის საქართველოს ბაზარზე განთავსებაზე პასუხისმგებელი პირი საკუთარი პასუხისმგებლობითა და საქსტანდარტის მიერ დადგენილი წესით ადგენს რადიოდანადგარისა ან/და სატელეკომუნიკაციო ტერმინალური დანადგარის შესაბამისობის დეკლარაციას, რომელიც უნდა მოიცავდეს სულ ცოტა შემდეგ მონაცემებს:
ა) მწარმოებლის ან საქართველოში მისი უფლებამოსილი წარმომადგენლის სახელწოდება და მისამართი;
ბ) პროდუქციის საიდენტიფიკაციო მონაცემები (სახელი, ტიპი, მოდელის ნომერი და ნებისმიერი სხვა დამატებითი ინფორმაცია, როგორიცაა პარტია, ჯგუფი, სერიული ნომერი);
გ) წარმოებული დანადგარის ყველა თანდართული დოკუმენტაცია;
დ) შესაბამისი ევროპული სტანდარტის ზუსტი და სრული დასახელება;
ე) სხვა დამატებითი ინფორმაცია;
ვ) უფლებამოსილი პირის ხელმოწერა;
ზ) დეკლარაციის შედგენაზე სრული პასუხისმგებლობის მქონე პირი.
2. მწარმოებელი ადგენს ტექნიკურ დოკუმენტაციას, რომელიც უზრუნველყოს დანადგარის ამ რეგლამენტით განსაზღვრულ ძირითად მოთხოვნებთან შესაბამისობის დადგენას. იგი მოიცავს დანადგარის კონსტრუირებისა და წარმოების პროცესის შესახებ შემდეგ ინფორმაციას:
ა) დანადგარის ზოგადი აღწერილობა;
ბ) კონცეპტუალური კონსტრუქცია, წარმოების ესკიზი, კომპონენტების სქემები და სხვ;
გ) ესკიზების, სქემებისა და დანადგარის მუშაობის პრინციპის აღწერა და განმარტება;
დ) ევროპული ჰარმონიზებული სტანდარტების ჩამონათვალი, რომელიც გამოიყენება მთლიანად ან ნაწილობრივ; ევროპის ჰარმონიზებული სტანდარტების გამოუყენებლობის შემთხვევაში, ამ რეგლამენტით განსაზღვრული ძირითადი მოთხოვნების შესასრულებლად მიღებული გადაწყვეტილებების აღწერა;
ე) გამოცდის (ტესტირების) შედეგები და სხვ.
3. მწარმოებელი ან საქართველოში მისი უფლებამოსილი წარმომადგენელი, ხოლო მათი საქართველოში არყოფნის შემთხვევაში, იმპორტიორი ან/და დანადგარის ბაზარზე განთავსებაზე პასუხისმგებელი პირი ვალდებულია შეინახოს შესაბამისობის დეკლარაცია და ტექნიკური დოკუმენტაცია მისი შედგენიდან 10 წლის მანძილზე.
4. მწარმოებელი ვალდებულია უზურნველყოს წარმოების პროცესის ამ მუხლით განსაზღვრულ ტექნიკურ დოკუმენტაციასთან და წარმოებული პროდუქციის ამ რეგლამენტის მოთხოვნებთან შესაბამისობა