ა) „საფრთხეშემცველი ტვირთი” – ნივთიერება, მასალა, ნაკეთობა, წარმოებისა და სხვა საქმიანობის ნარჩენი, რომელმაც გარკვეული პირობების არსებობისას გადაზიდვის, დატვირთვა-გადმოტვირთვისა და შენახვის პროცესში, თავისი თვისებისა და თავისებურების გამო, შეიძლება უარყოფითად იმოქმედოს გარემოზე, გამოიწვიოს აფეთქება, ხანძარი ან სატრანსპორტო საშუალების, მოწყობილობისა და შენობა-ნაგებობის დაზიანება, აგრეთვე ადამიანის, ცხოველისა და ფრინველის სიკვდილი, დასახიჩრება ან ჯანმრთელობის სხვაგვარი დაზიანება;
ბ) 1-ლი კლასის საფრთხეშემცველი ტვირთი – ფეთქებადი ნივთიერება, რომელიც მექანიკური, ელექტრონული ან სხვა სახის ზემოქმედების შედეგად განიცდის ქიმიურ გარდაქმნას, აგრეთვე პიროტექნიკური ნივთიერება და შედგენილობა (ნაკეთობა), რომელიც შეიცავს ერთ ან რამდენიმე ფეთქებად ან პიროტექნიკურ ნივთიერებას;
გ) მე-2 კლასის საფრთხეშემცველი ტვირთი – შეკუმშული, გათხევადებული ან ხსნადი სახით გადასაზიდი აირი, რომელიც მუდმივად იმყოფება წნევის ქვეშ და მოითხოვს განსაკუთრებულად მკვიდრ და ჰერმეტულ შეფუთვას;
დ) მე-3 კლასის საფრთხეშემცველი ტვირთი – ნივთიერება, რომლის ძირითად საფრთხეს წარმოადგენს ღია ცეცხლის, ნაპერწკლის ან ელექტრონული განმუხტვის ზემოქმედების შედეგად აალებადი ორთქლის გამოყოფის უნარი, რომელიც ჰაერთან ურთიერთობისას ქმნის აფეთქებასაფრთხიან ნარევს. ამ ნივთიერებას (ადვილაალებად სითხეს) შეიძლება ჰქონდეს ნარკოტიკული მოქმედება, ზოგიერთი კი მაღალტოქსიკურია;
ე) მე-4 კლასის საფრთხეშემცველი ტვირთი – ნივთიერება და მასალა, რომელსაც გადაზიდვის პროცესში გარე ანთების წყაროს ზემოქმედებით, წყალსა და ჰაერის ტენიანობასთან ურთიერთობით გამოწვეული თვითნებური ქიმიური რეაქციებისა და გახურების შედეგად ადვილად ეკიდება ცეცხლი;
ვ) მე-5 კლასის საფრთხეშემცველი ტვირთი – ნივთიერება, რომელიც გამოყოფს ჟანგბადს, რაც იწვევს საწვავი ნივთიერების თვითაალებას, ხელს უწყობს მის წვას, ზრდის ხანძრის ინტენსივობას ან ქმნის ფეთქებად ნარევს სხვა ნივთიერებასთან ურთიერთობის შედეგად;
ზ) მე-6 კლასის საფრთხეშემცველი ტვირთი – ნივთიერება, რომლის ორგანიზმში მოხვედრამ, კანთან კონტაქტმა ან შესუნთქვამ შეიძლება გამოიწვიოს მოწამვლა ან დაავადება;
თ) მე-8 კლასის საფრთხეშემცველი ტვირთი – ნივთიერება, რომელიც აზიანებს ცოცხალ ქსოვილს და იწვევს სხვადასხვა მასალის დაშლას. მისმა ორთქლმა და მტვერმა შეიძლება გამოიწვიოს ორგანიზმის მოწამვლა, ზოგიერთი კი ჟანგვადია;
ი) მე-9 კლასის საფრთხეშემცველი ტვირთი – 1-ლ-მე-8 კლასს არმიკუთვნებული საფრთხეშემცველი ტვირთი და ტვირთი, რომელიც საფრთხეშემცველია მხოლოდ წყალსანაოსნო ტრანსპორტით დაყრით გადაზიდვისას