1. ტრანსპორტირების ლიცენზიატმა უნდა განახორციელოს სისტემით მოსარგებლეებისთვის მიწოდების პუნქტში გაცემული ბუნებრივი გაზის ხარისხის მახასიათებლების მონიტორინგი დანართი №1-ის შესაბამისად. ტრანსპორტირების ლიცენზიატი ვალდებულია შეატყობინოს შესაბამის სისტემით მოსარგებლეებს, რომ მიწოდების პუნქტში გასაცემად ხელმისაწვდომი, გაცემის პროცესში მყოფი ან გაცემული ბუნებრივი გაზი არის არასტანდარტული, გარდა ამ მუხლის მე-5 პუნქტით განსაზღვრული შემთხვევებისა.
2. თითოეულმა სისტემით მოსარგებლემ, რომლისთვისაც ცნობილი გახდება რომ მისთვის გაცემის პროცესში მყოფი ბუნებრივი გაზი არის არასტანდარტული, ამის თაობაზე უნდა შეატყობინოს ტრანსპორტირების ლიცენზიატს.
3. თუ ტრანსპორტირების ლიცენზიატისთვის ცნობილი გახდება, რომ მიწოდების პუნქტიდან გასაცემად ხელმისაწვდომი, გაცემის პროცესში მყოფი ან გაცემული ბუნებრივი გაზი არის არასტანდარტული, იგი ვალდებულია შესაბამის სისტემით მოსარგებლეებს დაუყოვნებლივ აცნობოს:
ა) ბუნებრივი გაზის ხარისხის ის მაჩვენებლები, რომლებიც არ შეესაბამება ამ წესების დანართი №2-ით განსაზღვრულ ხარისხობრივ მახასიათებლებს და შესაბამისი პროცენტული განსხვავება;
ბ) ბუნებრივი გაზის ხარისხის მახასიათებლების ნორმებთან შესაბამისობის აღდგენისათვის საჭირო სავარაუდო დრო.
4. ბუნებრივი გაზის ხარისხის მახასიათებლების დადგენილ ნორმებთან შესაბამისობის აღდგენის შემდეგ, ტრანსპორტირების ლიცენზიატი შესაბამის ინფორმაციას დაუყოვნებლივ უგზავნის შესაბამის სისტემით მოსარგებლეებს.
5. ტრანსპორტირების ლიცენზიატს არ ეკისრება სისტემით მოსარგებლეებისათვის შეტყობინების ვალდებულება, თუ გასაცემად ხელმისაწვდომი, გაცემის პროცესში მყოფი ან გაცემული ბუნებრივი გაზის ხარისხის მახასიათებლების დადგენილ ნორმებთან შესაბამისობა აღდგენილ იქნება არასტანდარტული ბუნებრივი გაზის იდენტიფიცირებიდან 1 (ერთი) საათის განმავლობაში.
6. არასტანდარტული ბუნებრივი გაზის გაცემის შესახებ ტრანსპორტირების ლიცენზიატის შეტყობინების მომენტიდან იმავე პუნქტში გასაცემად ხელმისაწვდომი ბუნებრივი გაზის ხარისხობრივი მაჩვენებლების დადგენილ ნორმებთან შესაბამისობის აღდგენის მომენტამდე სისტემით მოსარგებლეს უფლება აქვს:
ა) მიწოდების პუნქტიდან მიიღოს ან გააგრძელოს არასტანდარტული ბუნებრივი გაზის მიღება;
ბ) შეამციროს ან შეწყვიტოს მიწოდების პუნქტიდან არასტანდარტული მახასიათებლების ბუნებრივი გაზის მიღება.
7. სისტემით მოსარგებლეებმა ტრანსპორტირების ლიცენზიატს დაუყოვნებლივ უნდა შეატყობინონ ამ მუხლის მე-6 პუნქტით განსაზღვრული გადაწყვეტილების შესახებ.
8. თუ სისტემით მოსარგებლეებისთვის მიწოდების პუნქტიდან გაიცა არასტანდარტული ბუნებრივი გაზი და მათ, აღნიშნულის შესახებ, ამ მუხლის მოთხოვნების შესაბამისად ტრანსპორტირების ლიცენზიატისგან შეტყობინება არ ჰქონდათ მიღებული, ტრანსპორტირების ლიცენზიატი ვალდებულია გადაუხადოს კონპენსაცია ზემოხსენებულ სისტემით მოსარგებლეებს ნებისმიერი ზიანისთვის. ტრანსპორტირების ლიცენზიატის მიერ თითოეული მოსარგებლისთვის გადახდილი კომპენსაციის ოდენობა არ უნდა აღემატებოდეს შესაბამისი გაზის ტრანსპორტირების ხელშეკრულებით განსაზღვრულ ზედა ზღვარს.
9. სისტემით მოსარგებლის მიერ ტრანსპორტირების ლიცენზიატისგან კომპენსაციის მიღების უფლების უზრუნველყოფის მიზნით, სისტემით მოსარგებლემ უმოკლეს ვადაში უნდა წარუდგინოს ტრანსპორტირების ლიცენზიატს მოთხოვნა, რომელშიც მოცემული უნდა იყოს, სულ მცირე, შემდეგი საკითხები:
ა) მიწოდების პუნქტები და დღეები, რომლის განმავლობაშიც ტრანსპორტირების სისტემიდან გაცემულ იქნა არასტანდარტული ბუნებრივი გაზი;
ბ) თითოეული მიწოდების პუნქტიდან გაცემული არასტანდარტული ბუნებრივი გაზის ოდენობა და სხვა საჭირო მონაცემები იმის დასადასტურებლად, რომ გაცემული ბუნებრივი გაზი იყო არასტანდარტული;
გ) ხარჯების ანალიზი და დასაბუთება, რომლის თანახმადაც მას აქვს უფლება მოითხოვოს ტრანსპორტირების ლიცენზიატისგან კომპენსაცია.
10. ტრანსპორტირების ლიცენზიატი ვალდებულია მოთხოვნის შემთხვევაში სისტემით მოსარგებლეს მიაწოდოს მის ხელთ არსებული ყველა ინფორმაცია, რომელიც საჭიროა სისტემით მოსარგებლის მიერ ამ მუხლის მე-9 პუნქტით გათვალისწინებული მოთხოვნის უზრუნველსაყოფა