1. ფეთქებადი მასალები ინახება მხოლოდ ამ მიზნისათვის განკუთვნილ სათავსებში და ადგილებზე. ფეთქებადი მასალების შენახვა ისე უნდა იყოს ორგანიზებული, რომ გამოირიცხოს მათი დანაკლისი და გაფუჭება.
2. ფეთქებადი მასალების შესანახ ადგილს (გარდა საამფეთქებლო სამუშაოებთან ახლოს მდებარე ერთი ცვლისათვის საჭირო ფეთქებადი მასალების ყუთებისა და სეიფებისა) საექსპლუატაციოდ იღებს საწარმოს ხელმძღვანელის ბრძანების საფუძველზე შექმნილი კომისია, რომლის შემადგენლობაში შედიან მფლობელი საწარმოს, ტექზედამხედველობისა და ხანძარსაწინააღმდეგო სამსახურის წარმომადგენლები. მიღება ფორმდება აქტით.
3. საწარმო ვალდებულია ფეთქებადი მასალების მუდმივი და დროებითი საწყობებისათვის, აგრეთვე დასარიგებელი კამერებისათვის იქონიოს პასპორტები №I დანართის მიხედვით. პასპორტის ერთი ეგზემპლარი ინახება სამუშაო ადგილზე ფეთქებადი მასალების საწყობის გამგესთან.
4. საამფეთქებლო სამუშაოებთან ახლოს მდებარე საუბნე პუნქტებში (სეიფებში) და სამეცნიერო და სასწავლო ორგანიზაციებში (სეიფებსა და სათავს-სეიფებში) ფეთქებადი მასალები შეინახება ინსტრუქციის შესაბამისად, რომელსაც ამტკიცებს ორგანიზაციის ხელმძღვანელი ტექზედამხედველობასთან შეთანხმებით.
5. სამეცნიერო და სასწავლო ორგანიზაციებში დამზადებული ფეთქებადი მასალები ინახება მათთვის სპეციალურად განკუთვნილ სეიფებში. ახლად დამზადებული ფეთქებადი მასალის შენახვა ისეთ ფეთქებად ნივთიერებებთან და აფეთქების საშუალებებთან ერთად (ერთ სეიფში), რომლებზეც ტექზედამხედველობის მიერ გაცემულია ნებართვა მათი გამოყენების შესახებ, დაუშვებელია.
6. ფეთქებადი მასალების ყუთები, ტომრები, კოლოფები და კონტეინერები შესანახ ადგილებზე იხურება ხუფით ან იკვრება თოკით.
7. ფეთქებადი მასალების საწყობებში ფეთქებადი მასალების სათავსები იკეტება კლიტით, იპლომბება ან იბეჭდება. ისეთ სათავსებში, სადაც გამცემების სადღეღამისო მორიგეობაა, ფეთქებადი მასალების დაპლომბვა ან დაბეჭდვა აუცილებელი არ არის