1. ადამიანის ორგანიზმზე საწარმოო გარემოს რისკ-ფაქტორების, კერძოდ მანგანუმისა და ვიბრაციის ერთდროული არახელსაყრელი ზემოქმედების მედიკო-ბიოლოგიური პროფილაქტიკის ერთ-ერთ მნიშვნელოვან ასპექტს წარმოადგენს სავალდებულო წინასწარი და პერიოდული სამედიცინო გასინჯვები. ყველა ის პირი, რომელიც მუშაობას იწყებს მავნე საწარმოო ფაქტორის არსებობის პირობებში, უნდა ექვემდებარებოდეს წინასწარ სამედიცინო გასინჯვას, რომლის მიზანია – მოცემული პროფესიისათვის პიროვნების ვარგისიანობის დადგენა, უკუჩვენებების გამოვლენა და პროფესიული დაავადებების თავიდან აცილება.
2. გასინჯვების ჩატარებისას გათვალისწინებული უნდა იყოს ორგანიზმის ინდივიდუალური თავისებურებანი, რომელიც იწვევს პროფესიული პათოლოგიის განვითარებას შედარებით მოკლე ვადებში.
3. სამედიცინო გასინჯვები უნდა ტარდებოდეს იმ სამკურნალო დაწესებულების ექიმ-სპეციალისტების მიერ, რომლებიც ემსახურებიან ამა თუ იმ წარმოებას.
4. ჩატარებული გამოკვლევები საშუალებას იძლევა გაირკვეს მავნე და არახელსაყრელ შრომის პირობებში მომუშავის პროფვარგისიანობა. სამუშაოზე მიღებულ პირთა გამოკვლევის შედეგები ფიქსირდება მათ პირად ამბულატორიულ რუკაში (ფორმა №025) და მხედველობაში მიიღება პერიოდული სამედიცინო გასინჯვებისას. შემუშავებულია სპეციალური უკუჩვენებები საშიშ და მავნე ნივთიერებებთან კონტაქტში სამუშაოდ მუშაკის მიღებისას.
5. პერიოდული სამედიცინო გასინჯვები უზრუნველყოფს პროფესიული რისკის პირობებში მომუშავეთა ჯანმრთელობის მდგომარეობაზე დინამიკურ დაკვირვებას, პროფესიული დაავადების ადრეულ დიაგნოსტიკას, მის პროფილაქტიკას და საერთო სომატური დაავადებების გამოვლენას, რომელიც შრომის არახელსაყრელ პირობებში მუშაობის წინააღმდეგ ჩვენებას წარმოადგენს.
6. პერიოდული სამედიცინო გასინჯვის ჩატარების შემდეგ მომუშავის სამუშაოზე დაშვების საკითხი წყდება ინდივიდუალურად: ჩვენებებისა და უკუჩვენებების, ორგანიზმის ფუნქციური მდგომარეობის, პათოლოგიური პროცესის ხასიათის და გამოხატულების ხარისხის, ასაკის, სამუშაო სტაჟის, პროფესიული მომზადების, შრომის პირობების და სხვ. გათვალისწინებით