„თავდაცვის დაგეგმვის შესახებ“ საქართველოს კანონში ცვლილების შეტანის თაობაზე“

პროექტი საქართველოს კანონი „თავდაცვის დაგეგმვის შესახებ“ საქართველოს კანონში ცვლილების შეტანის თაობაზე მუხლი 1. „თავდაცვის დაგეგმვის შესახებ“ საქართველოს კანონის (საქართველოს საკანონმდებლო მაცნე, №15, 16.05.2006, მუხ. 107) მე-11 მუხლი ჩამოყალიბდეს შემდეგი რედაქციით: „მუხლი 11. თავდაცვის დაგეგმვის საპარლამენტო კონტროლი საქართველოს პარლამენტი, საქართველოს კონსტიტუციითა და საქართველოს პარლამენტის რეგლამენტით გათვალისწინებული ფორმითა და წესით ახორციელებს თავდაცვის დაგეგმვის საპარლამენტო კონტროლს.“. მუხლი 2. ეს კანონი ამოქმედდეს საქართველოს პრეზიდენტის მომდევნო არჩევნებში არჩეული საქართველოს პრეზიდენტის მიერ ფიცის დადებისთანავე. საქართველოს პრეზიდენტი გიორგი მარგველაშვილი 1

განმარტებითი ბარათი „თავდაცვის დაგეგმვის შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტზე ა) ზოგადი ინფორმაცია კანონპროექტის შესახებ: ა.ა) კანონპროექტის მიღების მიზეზი: კანონპროექტის შემუშავება განაპირობა საქართველოს პარლამენტის რეგლამენტის ახალმა პროექტმა, რომელიც აერთიანებს საქართველოს თავდაცვა-უსაფრთხოების სექტორის მიმართ საპარლამენტო კონტროლის ფორმებს. ა.ბ) კანონპროექტის მიღების მიზანი: პროექტის შემუშავების მიზანია „თავდაცვის დაგეგმვის შესახებ“ საქართველოს კანონის შესაბამისობაში მოყვანა საქართველოს პარლამენტის რეგლამენტის ახალ პროექტთან. ა.გ) კანონპროექტის ძირითადი არსი: საქართველოს პარლამენტის რეგლამენტის ახალი პროექტი აუქმებს „ნდობის ჯგუფის შესახებ“ საქართველოს კანონს, ისევე, როგორც პარლამენტის მუშაობასთან დაკავშირებულ სხვა კანონებს (მაგალითად - „საპარლამენტო ფრაქციის შესახებ“ საქართველოს კანონს) და პარლამენტის საქმიანობასთან დაკავშირებულ დებულებებს აერთიანებს მხოლოდ რეგლამენტში. გამომდინარე აქედან, „თავდაცვის დაგეგმვის შესახებ“ საქართველოს კანონის მე-11 მუხლში, რომელიც თავდაცვის დაგეგმვის საპარლამენტო კონტროლს ადგენს, მითითება ხდება საქართველოს პარლამენტის რეგლამენტზე და საქართველოს კონსტიტუციაზე. საქართველოს პარლამენტის ახალი რეგლამენტის პროექტი დეტალურად და მკაფიოდ გაწერს პარლამენტის თავდაცვისა და უშიშროების კომიტეტის, ნდობის ჯგუფის, პარლამენტის პლენარული სხდომის, დროებითი საგამოძიებო კომისიების და სხვათა საკონტროლო უფლებამოსილებებს და მათი განხორციელების წესებს, ანგარიშვალდებული ორგანოებისა თუ თანამდებობის პირების მიმართ. გარდა ამისა, სწორედ პარლამენტის რეგლამენტია ის დოკუმენტი, რომლითაც უნდა განისაზღვროს პარლამენტის მუშაობასთან დაკავშირებული საკითხები, მათ შორის ისიც, რომელი სტრუქტურული ერთეულების საშუალებით ახორციელებს და როგორი ფორმის კონტროლს, შესაბამის სახელმწიფო დაწესებულებებზე. სწორი საკანონმდებლო ტექნიკის დამკვიდრების მიზნით მნიშვნელოვანია, პარლამენტის სამუშაო დებულებები მოცემული იყოს მხოლოდ პარლამენტის რეგლამენტში. სპეციალურ კანონებში დუბლირებულ ჩანაწერებს არავითარი სამართლებრივი დატვირთვა არ აქვს და ამასთანავე ხშირად რეგლამენტთან წინააღმდეგობაში მოდის. სწორედ აღნიშნულის გამოსარიცხად ხორციელდება ცვლილება წარმოდგენილი კანონპროექტით. ბ) კანონპროექტის ფინანსური დასაბუთება: ბ.ა) კანონპროექტის მიღებასთან დაკავშირებით აუცილებელი ხარჯების დაფინანსების წყარო: კანონპროექტის მიღება არ გამოიწვევს დამატებით ხარჯებს. ბ.ბ) კანონპროექტის გავლენა ბიუჯეტის საშემოსავლო ნაწილზე: კანონპროექტის მიღება არ მოახდენს გავლენას ბიუჯეტის საშემოსავლო ნაწილზე. ბ.გ) კანონპროექტის გავლენა ბიუჯეტის ხარჯვით ნაწილზე: კანონპროექტი არ იქონიებს გავლენას ბიუჯეტის ხარჯვით ნაწილზე. ბ.დ) სახელმწიფოს ახალი ფინანსური ვალდებულებები: კანონპროექტის მიღება არ ითვალისწინებს სახელმწიფოს მიერ ახალი ფინანსური ვალდებულებების აღებას. ბ.ე) კანონპროექტის მოსალოდნელი ფინანსური შედეგები იმ პირთათვის, რომელთა მიმართაც ვრცელდება კანონპროექტის მოქმედება: კანონპროექტი არ იწვევს რაიმე ფინანსურ შედეგებს იმ პირთათვის, რომელთა მიმართაც ვრცელდება კანონპროექტის მოქმედება. ბ.ვ) კანონპროექტით დადგენილი გადასახადის, მოსაკრებლის ან სხვა სახის გადასახდელის ოდენობა და ოდენობის განსაზღვრის პრინციპი: კანონპროექტი არ ითვალისწინებს რაიმე სახის გადასახადს, მოსაკრებელს ან სხვა სახის გადასახდელს. გ) კანონპროექტის მიმართება საერთაშორისო სამართლებრივ სტანდარტებთან: გ.ა) კანონპროექტის მიმართება ევროკავშირის დირექტივებთან: კანონპროექტის მიღება არ ეწინააღმდეგება ევროკავშირის დირექტივებს. გ.ბ) კანონპროექტის მიმართება საერთაშორისო ორგანიზაციებში საქართველოს წევრობასთან დაკავშირებულ ვალდებულებებთან: კანონპროექტის მიღებით არ წარმოიქმნება საერთაშორისო საქართველოს წევრობასთან დაკავშირებული ვალდებულებები. გ.გ) კანონპროექტის მიმართება საქართველოს ორმხრივ ორგანიზაციებში და მრავალმხრივ ხელშეკრულებეთან: კანონპროექტი არ ეწინააღმდეგება საქართველოს ორმხრივ და მრავალმხრივ ხელშეკრულებებს. დ) კანონპროექტის მომზადების პროცესში მიღებული კონსულტაციები: დ.ა) სახელმწიფო, არასახელმწიფო ან/და საერთაშორისო ორგანიზაცია/დაწესებულება, ექსპერტები, რომლებმაც მონაწილეობა მიიღეს ცვლილებათა პროექტის შემუშავებაში, ასეთის არსებობის შემთხვევაში: ასეთი არ არსებობს. დ.ბ) კანონპროექტის შემუშავებაში მონაწილე ორგანიზაციის (დაწესებულების) ან/და ექსპერტის შეფასება კანონპროექტის მიმართ, ასეთის არსებობის შემთხვევაში: ასეთი არ არსებობს. ე) კანონპროექტის ავტორი: კანონპროექტის ავტორია პარლამენტის თავმჯდომარის პირველი მოადგილე - თამარ ჩუგოშვილი. ვ) კანონპროექტის ინიციატორი: კანონპროექტის ინიციატორები არიან პარლამენტის წევრები: ირაკლი კობახიძე, თამარ ჩუგოშვილი, ირინე ფრუიძე, გიორგი კახიანი, ანრი ოხანაშვილი, ეკა ბესელია, მამუკა მდინარაძე, არჩილ თალაკვაძე, ირაკლი სესიაშვილი, ირაკლი ბერაია, გურამ მაჭარაშვილი.

„თავდაცვის დაგეგმვის შესახებ“ საქართველოს კანონის იმ მუხლის მოქმედი სრული რედაქცია, რომელშიც წარმოდგენილი კანონპროექტით შედის ცვლილება მუხლი 11. თავდაცვის დაგეგმვის საპარლამენტო კონტროლი თავდაცვის დაგეგმვის საპარლამენტო კონტროლს ახორციელებს საქართველოს პარლამენტის თავდაცვისა და უშიშროების კომიტეტი.