1. ყველა ის საავიაციო მოვლენა, რომელიც მოკვლევის ბიუროსთვის ინტერესს არ წარმოადგენს, მოკვლეული უნდა იყოს საავიაციო მოვლენაში მონაწილე ავიასაწარმოს მიერ მოვლენის გამომწვევი მიზეზების და ხელშემწყობი ფაქტორების დადგენის მიზნით.
შენიშვნა: ავიასაწარმო უფლებამოსილია შიდა მოკვლევა ჩაატაროს ნებისმიერ მოვლენაზე მიუხედავად იმისა, ის წარმოადგენს თუ არა მოკვლევის ბიუროს კომპეტენციას.
2. ავიასაწარმო ვალდებულია შეიმუშაოს და დანერგოს საავიაციო მოვლენების მოკვლევის პროცედურა.
3. ავიასაწარმომ უნდა უზრუნველყოს, რომ ამ მუხლის შესაბამისად ჩატარებული ნებისმიერი მოკვლევა იყოს განცალკევებული ადმინისტრაციული წარმოებისგან, პასუხისმგებლობის დაკისრების მიზნით.
4. საავიაციო მოვლენის მოკვლევის ობიექტურად წარმართვის მიზნით, თუ მოკვლევის მონაწილეც არის საქართველოში რეგისტრირებული რამდენიმე ავიასაწარმო, თითოეული ვალდებულია გაცვალოს მოვლენასთან დაკავშირებული დეიდენტიფიცირებული ინფორმაცია და სურვილისამებრ უფლებამოსილია ჩაერთოს მოკვლევაში.
5. საავიაციო მოვლენები, რომლებიც ზემოქმედებას ახდენს ფრენის უსაფრთხოებაზე, დაუყოვნებლივ უნდა იქნეს მოკვლეული.
6. ავიასაწარმომ უნდა აცნობოს სააგენტოს საავიაციო მოვლენის მოკვლევის შედეგების შესახებ, საავიაციო მოვლენის შესახებ ინფორმაციის მიღებიდან 30 დღის განმავლობაში, ხოლო იმ შემთხვევაში თუ ობიექტური მიზეზების გამო ვერ ხერხდება მოკვლევის დამთავრება 30 დღის განმავლობაში, მან სააგენტოსთან წინაწარი შეთანხმების საფუძველზე მოკვლევის ანგარიში უნდა წარადგინოს არაუგვიანეს 90 დღის ვადაში.
7. საავიაციო მოვლენის მოკვლევის საფუძველზე, ავიასაწარმო ვალდებულია საჭიროებისამებრ განსაზღვროს მაკორექტირებელი ან პრევენციული ღონისძიებები, რომლებიც მიმართულია საავიაციო უსაფრთხოების დონის ასამაღლებლად.
8. თუ საავიაციო მოვლენის მოკვლევის შედეგად ავიასაწარმო განსაზღვრავს სათანადო მაკორექტირებელ ან პრევენციულ ღონისძიებებს, იგი ვალდებულია:
ა) დროულად განახორციელოს დასახული ღონისძიებები;
ბ) დანერგოს დასახული ღონისძიებების რეალიზებასა და ეფექტურობაზე მონიტორინგის პროცესი.
9. ავიასაწარმომ უნდა უზრუნველყოს უსაფრთხოებასთან დაკავშირებული რეკომენდაციების და გამოსასწორებელი ღონისძიებების შემუშავება, წერილობითი ფორმით შენახვა და მათი შესრულების მონიტორინგი.
10. მოკვლევის საბოლოო ანგარიში, მინიმუმ, უნდა მოიცავდეს საავიაციო მოვლენის შესახებ შემდეგ ინფორმაციას:
ა) მოკვლევის თავფურცელი (სააგენტოს მონაცემთა ბაზის საიდენტიფიკაციო ნომრის მითითება ასეთის არსებობის შემთხვევაში ან უნიკალური კოდის, ასევე მოკვლევის დაწყების და დამთავრების თარიღების მითითება, მოკვლევის სახელწოდება და მომკვლევი ავიასაწარმოს დასახელება);
ბ) შინაარსი (იმის აღწერილობა, თუ რით იყო ამ საავიაციო მოვლენის მოკვლევის დაწყება განპირობებული, ასევე რა წეს(ებ)ის და პროცედურების მიხედვით არის შესრულებული აღნიშნული მოკვლევა);
გ) საავიაციო მოვლენის მომკვლევთა ჯგუფი (მიუთითეთ მოკვლევაში ჩართული პერსონალის ვინაობა მათი პოზიციების და ჩართულობის მიხედვით);
დ) ფაქტობრივი მონაცემები (მიუთითეთ ყველა შესაბამისი მოვლენის ტიპი ტაქსონომიის მიხედვით ქრონოლოგიური თანმიმდევრობით, რაც უზრუნველყოფს მოვლენების ჯაჭვის უკეთ წაკითხვასა და სისრულეს);
ე) მონაცემების ანალიზი (გაანალიზეთ თუ რა შესრულდა ან არ შესრულდა პროცედურების ან წესების მიხედვით, მოწყობილობის ან აღჭურვილობის გამართულობა ან მისი არ არსებობა, ადამიანური ფაქტორები და კომპეტენციები, ორგანიზაციის მართვის სისტემა და ასევე გარემო სადაც აღნიშნული მოვლენა მოხდა);
დასკვნები:
ე.ა) საავიაციო მოვლენით წარმოქმნილი რისკის ინდექსი;
ე.ბ) საავიაციო მოვლენის გამომწვევი მიზეზები და ხელშემწყობი ფაქტორები;
ე.გ) საავიაციო მოვლენის კლასი, იკაოს ტაქსონომიის მიხედვით;
ე.დ) საავიაციო მოვლენის კატეგორია, იკაოს ტაქსონომიის მიხედვით;
ვ) ფრენის უსაფრთხოების უზრუნველყოფის რეკომენდაციები (რეკომენდაციების ჩამონათვალი ჯგუფების მიხედვით (საჰაერო ხომალდი/აღჭურვილობა/ტექნიკური საშუალება, პერსონალი, წესები/პროცედურები და მართვის სისტემა/გარემო);
ზ) დანართები. მოკვლევის დროს მოძიებული მტკიცებულებები.
11. მოკვლევის საბოლოო ანგარიში და სხვა ჩანაწერები, რომელიც უკავშირდება კონკრეტული საავიაციო მოვლენის მოკვლევას, უნდა ინახებოდეს საწარმოს მიერ მინიმუმ შვიდი წლის განმავლობაში და მოთხოვნისას წარედგინოს სააგენტოს.
12. ავიასაწარმო ვალდებულია რეგულარულად აცნობოს შესაბამის პირებს (თანამშრომლებს ან ქვეკონტრაქტით დაქირავებულ პერსონალს) იმ საავიაციო მოვლენების მოკვლევის და შემდგომი ქმედებების შესახებ, რომლის მიმართაც მიღებული იყო პრევენციული ან მაკორექტირებელი ღონისძიებები.
13. ავიასაწარმო ვალდებულია სააგენტოს მოთხოვნისას მიაწოდოს საავიაციო მოვლენის მოკვლევასთან დაკავშირებული ყველა დოკუმენტაცია (ის დოკუმენტაცია, რომელიც დაკავშირებულია აღნიშნულ საავიაციო მოვლენასთან), მოკვლევის პირველადი ან საბოლოო შედეგები ნებისმიერი საავიაციო მოვლენის შესახებ, რომლის შესახებაც სააგენტოს ეცნობა, მაგრამ რომელზედაც მას არ მიუღია ამ წესით გათვალისწინებული ინფორმაცია.
14. აეროდრომის ექსპლუატანტი უზრუნველყოს, რომ ყველა ორგანიზაცია, რომელიც მუშაობს ან ახორციელებს მომსახურებას აეროდრომზე, რომელიც დაკავშირებულია უსაფრთხოების საკითხებთან, მონაწილეობა მიიღოს საავიაციო მოვლენის მოკვლევაში და განხორციელდეს ნებისმიერი გამოვლენილი მაკორექტირებელი და/ან პრევენციული ღონისძიებ